八方有個朋友每次去旅行都專登揀747客機坐，話747又大又舒服，而且仲用緊機械結構嘅鋼纜控制方向舵、襟翼等，聽落可靠過電子嘢。八方唔知呢位朋友係咪太杞人憂天，但747客機確係帶畀港人好多回憶，有4個引擎、雙層客艙嘅大飛機低飛掠過九龍城降落嘅震撼（圖），唔少人仲記憶猶新。
服役37年見證輝煌
就算1998年搬機場，最後一架由啟德起飛同埋第一架喺赤鱲角降落嘅都係國泰航空嘅747客機。
國泰首架747客機喺1979年投入服務，由於載客量大、燃油效益高，令國泰當年極速發展國際長途航線網絡，高𥧌期曾經擁有32架747客機，見證香港輝煌時期。
時光飛逝，國泰機隊最後一架747客機，航班編號CX543，本周六飛完東京羽田機場返香港呢一程就要講拜拜，結束747客機喺國泰服役37年嘅生涯，只會剩番約20架747貨機繼續營運，以後長途直航，就會交畀同門師弟777同空中巴士A350負責喇。