彭浩翔導演嘅《志明與春嬌》系列，不經不覺已經開到第3集《春嬌救志明》，之前講過有機會搵奧斯卡影帝里安納度狄卡比奧（Leonardo DiCaprio）客串。而《春》片亦已經落實下月底開鏡，上星期三彭浩翔喺facebook公開招募客串。阿彭喺網頁分咗4類合適人士，包括日用文青、夜用潮人同動感運動人，就算唔係以上3種，都仲有歸類為特長嘅奇葩類別。阿彭喺網頁講到明「我們也召集各種奇人異士。如果你覺得自己能人所不能，來吧。」
傾影帝客串
噚日阿彭接受電話訪問，佢話招募宣傳出咗唔夠一個星期，已經收到幾百個應徵，佢話：「開始公佈到𠵱家有幾百人嚟報名，其實4欄係分類，啲人成日問我『入唔到4類咁點算呀？』冇乜所謂，方便大家分吓類啫。最缺係啲潮人囉，跳舞呀、索嗰啲囉，永遠都缺、夜場蒲友我哋永遠都要搵。」
阿彭又透露仲有唔少海外人士報名，佢話：「有啲海外嘅影迷應徵，話自己買埋機票酒店都得，只要我哋畀到個日期佢哋請假。但係拍戲個期成日改，搞到我哋好大壓力。」阿彭話因為劇本改動，所以余文樂喺戲中演志明嘅爸爸暫時未出場，之前講過屬意周潤發飾演，至於里安納度方面，阿彭仍然保持聯絡傾談中。
撰文：馮仁昭