「正面啲去睇，我諗我哋已經衰到貼地，冇得再衰啲。」喺周日主場以0:3大敗予修咸頓之後，韋斯咸嘅隊長麥克盧保都輸到冇神冇氣，惟有自嘲一吓啦。上季韋斯咸係前列黑馬，今季仲換埋新主場，係威係勢咁，點知家陣排尾三，六場輸咗五場，包括喺前日場英超，佢哋好似不設防咁，畀修咸頓嘅查理柯士甸、杜辛泰迪治同禾特普斯各入一球，喺主場吞三蛋輸波。盧保賽後勁踩自己隊波，話防線表現好可笑，如果唔係門將阿祖安卡斯迪路撲咗幾球，呢場應該會輸六球。據skyBET嘅資料，韋斯咸領隊比歷係下個被炒英超領隊嘅次熱，賠率得3.75倍，只係冷過史雲斯嘅古杜連。英國《太陽報》話球會畀比歷多三場機會，喺之後聯賽對米杜士堡、水晶宮同新特蘭，韋斯咸至少要贏到一場，否則炒魷。