【中環】文詠珊（Janice Man）早前與金融才俊男友吳啟楠（Carl Wu）蜜遊台灣，被本報讀者影到兩人不時頭貼頭玩手機，JM接受《蘋果》訪問時指她與男友都好忙，所以有時間就會爭取見面機會。
晚飯分開坐
前晚約8時半，JM與Carl在中環齊齊現身。不過今次JM放棄享受二人世界，與男友約大班朋友去蘭桂坊食晚飯，JM更罕有與男朋友分開坐，各自各應酬，直至大家暢飲前開心碰杯，Carl才歸位走回JM身邊，搭她膊頭影相。
而晚飯食到中段，JM終按捺不住與男友合體，主動走去搭Carl膊頭外，又不時掃Carl個頭及髮尾，晚飯食足三小時，大夥兒再轉場去附近一間位於地牢的酒吧繼續狂歡，當時已有一班人在場會合JM等人。
飲酒一粒鐘
不過，JM明顯與現場人士不太熟，相信是Carl的朋友，JM禮貌地跟各人傾偈，而Carl好識做，發現JM全身散發一個「悶」字，即時走到她身邊陪到實，更反過來摸JM個頭、掃背及玩她髮尾，相當合拍。而JM與Carl在酒吧逗留了一小時左右，便齊齊登上一架七人車離開。
攝影：陳辰、楊浩賢、黃柏倫