觀塘海濱長廊隔籬嘅「花旗大樓」噚日正式開幕，花旗集團行政總裁（CEO）高沛德、亞太區CEO高晉誠、香港區行長盧韋柏當然在場，就連擁有好多世界級表情嘅財爺曾俊華、會德豐（020）靚仔主席吳宗權（Douglas）都有到賀。
花旗請來財爺為舞獅點睛唔出奇，咁Douglas同花旗有乜關係呢？查實花旗大樓原先係會德豐嘅物業，樓高21層，前年花旗斥資54億元買入。
今年初開始，花旗約3,200名員工好似百鳥歸巢咁，逐步由位於不同地區嘅寫字樓，搬入觀塘新大樓，原本喺鰂魚涌同尖沙嘴嘅寫字樓冇咗，中環前「花旗銀行大廈」個office仲喺度，不過呢幢大廈已經改叫「冠君大廈」。