「糖王」郭鶴年旗下香格里拉（069）又有高層變動，郭鶴年62歲嘅長子郭孔丞將會退下來，辭任主席兼首席執行官，改任非執董，由38歲妹妹郭惠光接任主席，明年一月一日生效。
郭氏成員十分低調，極少曝光，小股東對佢哋嘅認知，可能都係喺讀通告嘅層面。
郭惠光原本坐鎮南華早報（583，現稱南潮控股），公司將傳媒業務賣畀阿里巴巴之後，郭惠光已於今年中辭任非執董。冇耐佢就由香格里拉非執董，轉做執董兼副主席，估唔到明年就升做主席。
不過，郭惠光只做主席，首席執行官（CEO）請人去做，請來CapitaLand Mall前CEO林明志明年1月擔任CEO。唔知換咗新人事，公司會否有新作風，管理層多啲見人呢？