為人父母最開心，莫過於仔女乖巧，唔惹事生非之餘又會陪伴在側。好似全國政協常委唐英年咁吖，囝囝唐嘉盛同3個囡囡都聽教聽話，最近唐唐飛到上海出席新書發佈會……嗱，唔好誤會，唔係唐唐出咗新書，而係唐唐爹哋唐翔千嗰本《唐翔千傳》搞簽名會，由唐唐代筆箒，唐唐細女嘉慧好孝順喎，陪住老竇到咗上海，並幫忙打點，相信唐唐都好happy。
話時話，本《唐翔千傳》都好似出咗一段時間嘞喎，仲搞簽書會？據聞本書最初只有繁體字版、其後再加印簡體字版，所以呢次係專程為簡體字版設嘅簽書會。
唐唐就喺簽書會致辭時話，父親向來行事低調，冇諗過為自己立傳，係喺各方人勸說下先至同意出書，佢話父親一直諗住回饋社會，係全家人嘅偶像。