八方相當年：
尹兆堅潮童變圓碌碌 - 李八方

手執一批尹兆堅那些年青葱照，大學有啲文青feel、初出茅廬做社工染髮變型仔，再大啲添熱血味，共通點都係瘦仔……歲月似乎唔只催人老，尹兆堅笑笑口，「年紀大咗，中年發福吖嘛，食無定時，又少運動！」
47歲嘅尹兆堅自細貪玩，讀書唔多叻，最弊唔識考試，「就算做功課好高分，但考試永遠唔掂」，相信係唔按marking schemes回答所致；直至留英讀書先顯出身價，「幾份功課都攞A+，破晒紀錄㗎」。

做過bellboy　自修入城大

初中就讀天主教新民書院，之後轉至葵涌圓玄學院第一中學，佢話預科考得唔多好，先後做過送貨、倉務同酒店bellboy，自修讀書後先考入城大應用社會科學系主修社會工作。
點解揀社工？原來同八九六四有關，呢件事令佢義憤填膺，六四前嘅8號風球維園集會，佢都有參加，事件亦令佢關心國事，大學時擔任學生會外務秘書，畢業後佢喺YWCA做過社工，因為要同年輕人溝通而刻意換潮look，「染過髮變啡毛㗎！」
1998年負笈英國Essex University讀社會學，「去到覺得自己好流，人哋分析嘅角度係好多」，其後一直從事社會工作，2003加入街工，同年當選葵青區議會石蔭選區區議員；2009年轉投民主黨，繼而任副主席，啱啱喺新界西立法會選舉勝出。