富翁M買咗一隻基金好多年，同基金嘅董事總經理P先生好熟，P先生剛去完紐約總部述職，聽完專家匯報回來，約咗富翁M食午飯，富翁M叫左丁山一齊去聽吓有乜新投資意見，認真俾面。
現在視像會議流行，大公司盡量削減旅行支出，P先生駛乜去紐約述職呀？P先生話：「確係大力削減飛行時間嘅，飛得多，對心臟有損，一啲都唔好玩，但呢次總部叫埋歐洲亞洲啲負責人去紐約一齊傾未來投資大形勢，華盛頓分部嘅『律師說客』團隊又嚟埋講總統大選形勢，所以要飛去紐約。」
P先生話佢地內部會議嘅事情唔可以透露，但投資大勢可以講一講：「三個月前總部嘅經濟分析師認為希拉莉篤定入主白宮，美國經濟政策唔會大變，共和黨民主黨各自開完大會，選出特朗普，希拉莉為總統候選人之後，我地華盛頓說客團認為希拉莉可以輕易取勝。但今次會議中，我聽到經濟師改變睇法，指特朗普不可不防，如果佢當選，股市好可能有大調整，華盛頓說客團隊評估最新大選形勢，指希拉莉近月不斷有壞消息，電郵門揮之不去，健康有疑點，前星期美國東部有炸彈襲擊，係阿富汗裔伊斯蘭所為，令特朗普反移民振振有詞，故此佢地認為入主白宮已經唔再一定係希拉莉，特朗普亦有一半機會。」
講咁多，即係點，買定沽？P先生話：「要開始止賺，逐漸沽貨，保留現金，賺少啲當作交保險費，特朗普做總統會震散大市，香港股市亦會受波及！」
富翁M一啲都唔客氣，即刻問：「咁我係唔係要賣基金，贖回現金？」P先生答：「唔駛啦，我地會針對形勢，沽售部份股票，增持現金，保護你地投資嘅。」P先生又真係講得幾好聽，呢啲叫做期望管理，令大戶投資者M先生定一定先，他日赫然見到特朗普成為總統嘅話，唔駛俾市場大調整嚇壞，佢對富翁M嘅服務都幾周到，令富翁M呢餐飯食得幾滿意。
走出會所扒房，富翁M問左丁山有無補充意見，左丁山素來認為特朗普上台係有傷害性嘅，呢個人會搞到世界局勢好緊張，外匯市場已有反映，每次特朗普民望上升，墨西哥披索匯價就會下跌，大家如果今朝九點睇電視辯論，見希拉莉失色不支嘅話，不妨訂下股票止賺、止蝕價。如果跌眼鏡又點，唔駛自責噃，大把經濟學專家、股票專家陪你一齊跌！