即將告別25年議會生涯嘅民主黨主席劉慧卿，噚日筵開8圍宴請傳媒好友，做過15年記者嘅卿姐人面極廣，出席陣容強勁，唔少佢嘅昔日戰友如今都係傳媒高層，輪流大爆卿姐採訪秘聞，包括為咗追新聞，唔畀現任有線高層趙應春去廁所，叫對方「搵條橡筋紮住佢」。
常着吊帶裙 花名艾曼妞
主家席包括廣播處長梁家榮、DBC行政總裁羅燦、有線高層趙應春、曾經係卿姐直選手下敗將嘅前兩局議員李鵬飛等。梁家榮話卿姐強悍風格40年如一日，唔畀面兼唔啞忍，霸氣兼膽識過人：「佢當年訪問房屋司Alan James Scott，佢約咗人做專訪，然後拉隊走人……佢係咁樣對待當年殖民地外國官員，係好得人驚。」
趙應春大爆卿姐喺無綫任採訪主任時點樣對待記者，當年仲要外出跑新聞嘅趙應春憶述有次喺香港仔「蛇王」，被卿姐點中要飛去上水採訪突發新聞，本嚟想「借尿遁」，點知畀卿姐喺個無線電機大聲叫佢「搵條橡筋紮住先！」之後人人見到佢，都問佢有冇帶橡筋返工。
趙應春仲講少少鹹往事，「你哋只係見過一張（卿姐穿吊帶裙相片），當年我哋日日都見到佢咁着，你可唔可以想像當年Emily一邊翹頭髮，一邊傾電話嗰個樣……當年佢一入職，佢有個花名叫艾曼妞（Emmanuelle，卿姐洋名係Emily Lau），艾曼妞係當年嘅情色電影女主角」。
羅燦則讚卿姐做事認真，個個都畀卿姐push得好辛苦，但極獲高層賞識，當年卿姐喺英國進修完，TVB前高層想叫佢回巢，卿姐say no；卿姐就話無綫太刻薄，待遇差，決定轉投英文媒體喎。
噚日以黑色長袖透視、入面着吊帶裙現身嘅卿姐話，會工作直到今個星期五，周六會同小學同學到越南旅行。佢本周五會將扎根多年嘅隆亨邨辦事處鎖匙交番畀房署。臨別贈言，卿姐叫大家無論做議員或記者，都係好似一隻狗咁，咬住塊骨頭唔好放，一定要窮追不捨，佢噚日仲逐一吻別白鴿黨候任議員。
李八方
mailto:[email protected]