樓市走勢難估過天氣，年頭大行唱淡，家陣又轉晒口風。樓市大好友、前星級分析員卓百德（Peter Churchouse）就十分consistent，keep住做大好友，話除非有中國經濟問題或歐盟解體呢類重大問題，否則好難見到樓市轉勢。
卓百德噚日出席一個午餐會，被問到樓市累跌12%，會否令市場信心下跌，佢就話唔多覺，因港樓同股市好大關連，股市好，樓市難跌。
佢指，低息環境令到樓市企硬，加上發展商畀特別優惠，市場上車門檻降低，以前買500呎單位，月均收入要達到3萬元先供得起，家陣2.5萬元已經上到車咁話。
年輕一輩對於卓百德可能認識唔深，佢年逾花甲，十幾年前已經係地產股嘅星級分析員，曾效力大摩，佢之外就係做過瑞銀嘅林奮強，當年兩位一出報告就會郁到個市。卓百德2009年離開大摩，自己搞基金。