雷神莫雷拉復出落筆打三更！呢位騎師界天王，這天於沙田馬場停賽期滿復出，頭場五班1200米騎大熱門「嶺喜峯」出擊，熱至2.2倍，直路率先突圍而出，可惜埋唔到尾，拉士被蘇偉賢馬房、羅理雅座騎「鴻圖戰士」追過屈居亞軍，「鴻圖戰士」8.8倍打開今季勝門，組合獨贏A2派27元。
綽號炒飯哥的羅理雅，近排手風順到不得了，剛周三晚於快活谷食出大四喜，這天移師沙田一開場又有馬贏，「鴻圖戰士」居中後上贏個多馬位，7歲馬取得在港第三 Win，而羅理雅季內暫時累積八場頭馬排第二，繼續追到領先的同鄉潘頓實一實。羅理雅上季尾已經三番四次後上氣走雷神，今場又食住佢，難怪網民封佢做雷神剋星。而今場賽後拉頭馬時，有位貌似張智霖太太袁詠儀的女士現身凱旋門，十分搶鏡。
今場大部份賽駒都未贏過，賽事水準唔高，二至四名順序為「嶺喜峯」、「永恆光輝」及「辣得寶」，四重彩派五萬一千幾。