隔牆有耳:郭炳江染黑髮自由自在 爹哋打氣 郭基煇破風排No.5 - 李八方

隔牆有耳:
郭炳江染黑髮自由自在 
爹哋打氣 郭基煇破風排No.5 - 李八方

第二屆香港單車節噚日舉行,活動由新鴻基地產贊助,新地執行董事郭基煇(Adam)本身係單車發燒友,當然有落場參賽。今年佢挑戰50公里賽事,以1小時19分完成,隊制計時賽就喺11隊中排第5。佢自言成績算唔錯,但最開心嘅係早前獲准保釋外出嘅爸爸郭炳江到場打氣,八方見郭炳江精神奕奕,已經將一頭白髮染番黑,同在場人士有講有笑,相信都好滿意囝囝嘅成績。

「阿爸係唔識踩單車」

Adam噚日完咗賽事後同傳媒分享破風心得,一直都笑瞇瞇,可能因為有爸爸捧場:「好溫暖啦見到佢,往年佢嚟唔到單車節,我都一直寫信、寄相畀佢睇。佢成日喺裏面話真係好想嚟睇,或者有日同你踩,今年算係夢想成真,心裏面好溫暖好感動。」
Adam話細細個學踩單車嘅經過都係典型,即係爸爸媽媽陪住踩三輪車,之後就拆咗個輔助轆,「爹哋媽咪用相機影你,跌親吓,喊就馬上過嚟……」佢之後補番句:「我阿爸係唔識踩單車!」
Adam話單車係群體運動,要互相扶持,就好似社會上唔少有需要嘅人,所以贊助單車節其中一個堅持係要與慈善掛鈎。Adam自言過去兩年公司發生唔少事,呢段時間佢記住:「弟兄們,我只有一件事,就是忘記背後,努力面前的,向着標竿直跑。」
單車節籌得300萬,受惠機構包括小童群益會、啟愛共融基金等。小童群益會委員趙崇基話希望幫低收入家庭兒童及家長建立健康生活習慣,而啟愛共融基金創辦人傅雅妮話唔少基層小朋友,幼稚園面試唔識講嘢冇學校收,所以計劃幫助佢哋。

李八方
mailto:[email protected]

郭炳江親自到場為囝囝打氣,即場畀like。