沙田馬場這天有兩位主角，包括停賽期滿復出的雷神莫雷拉，以及宣佈出年同28歲2009年港姐亞軍李姿敏結婚的52歲澳洲籍練馬師賀賢，結果兩人攜手贏馬。
第四場四班1200米草地，賀賢馬房的「索先生」配雷神早段居甚後位置，入直路走大外疊，結果後上一攻而破贏半馬位，大熱門單Win及組合獨贏A1，分別派29及14.5元正。
「索先生」上季開始出賽，本身出自本港拍賣會，身價550萬，馬主係史立德。此駒上季初出第二，之後三仗都上唔到名，今次新馬季復初出繼續用雷神，本月13日試泥閘擊敗「辣辣椒」勝出，這天出賽雖曾在閘前重新釘甲兼渾身大汗，但跑落依然生猛，「索先生」臨尾於外叠越衝越行，成功冚過直路一度拋離馬群的貼欄次熱門「辣辣椒」，就此取得服役首捷，賽果竟同試閘一樣，雷神停賽期滿復出亦告終於贏馬，佢同時為自己提前一日賀壽（本月26日32歲牛一）。史立德賽後同索腿千金史佩加一齊拉頭馬，不過史佩加穿長裙收起長腿，只露玉臂。
今場二至四名順序為「辣辣椒」、「笑眼光」及「勝在煌」，四重彩派1,919元。