提起大地，好多香港人都諗起Beyond金曲《大地》。沙田馬場這天尾段賽事，亦接連與大地扯上關係，皆因第九場「君臨大地」贏完，尾場第十場二班 1400米，輪到沈集成馬房「縱橫大地」配羅理雅勝出，就此開出一口「大地」孖寶。
沈集成旗下第二高分馬「縱橫大地」泥地三戰兩冠一亞，被喻為有新泥地王潛質，可惜評分不夠高，落選早前韓國盃，焗住在港跑草地，好在此馬草地威力亦強勁，今仗由羅理雅操刀留前鬥後，走位12、12、 11、1，贏亞軍「比卡超」四分三馬位，單Win及組合獨贏A2分別派67及20.5元。
外號炒飯哥的羅理雅近排炒出燒鵝味，搏殺好有鑊氣，這天以蘇偉賢之「鴻圖戰士」食出頭糊後，佢隔咗四個幾鐘之後，以沈集成「縱橫大地」食埋尾糊，個人近三次賽事共取七Win，累積九Win追到只少領先的同鄉潘頓一場排第二，至於沈廐季內增至五Win，其中四場都由羅理雅勝出，騎練合作正值蜜月期。
「縱橫大地」上仗開鑼日跑同班同程第四，二、三名分別為「馬跑得」及「比卡超」，後兩駒今場都有份跑。結果「比卡超」後上同「縱橫大地」串Q，「馬跑得」則獲季軍，第四名係「宅大大」，四重彩派二萬八千幾。