雷神第四場贏「索先生」後，第五場四班泥地1200米他又做主角，不過今場唔係雷神贏馬，而係由雷神策騎的大熱門馬「有禮」入閘後鬧情緒發脾氣疑似弄傷，結果被着令退出，所有已入閘馬須向後離開閘廂，給予馬迷時間重新下注，然後各駒重新入閘，孖寶投注了「有禮」的注碼，轉投開跑時最熱的「情意相投」，該駒最終只跑第三，轉投當輸。
前季曾獲5捷，今個暑假孫達志散倉後加盟苗禮德的「麟轉乾坤」，今仗轉廐初出，在郭能胯下沿途守第三位，直路後上贏頸位爆出33倍冷Win，成為孫達志冇牌後首匹轉廐勝出馬，組合獨贏A3派25.5元正。「麟轉乾坤」堪稱最神奇低班馬，連同今仗近三季七度取勝，下仗仍有可能留在四班作戰，本身累積五勝泥地短途，場地性能出色。
賽後曾有競賽小組研訊進行，主要關乎「麟轉乾坤」末段向外斜跑，結果名次不變。二至四名順序為「執子之手」、「情意相投」及「至尊駿爵」，四重彩派19萬幾。