旺成咁!蘇偉賢四Win彈上榜首難贏處女馬最後一步險勝

旺成咁!蘇偉賢四Win彈上榜首
難贏處女馬最後一步險勝

這天沙田日馬,應以「蘇偉賢日」命名,事關這位47歲練馬師贏到唔識停,跑完前七場已經中三元,到第八場三班田草1200米,連一直難贏的「麯院風荷」都俾雷神莫雷拉幫佢贏埋,單Win及組合獨贏A1分別派23及15.5元,蘇偉賢就此完成一日四捷呢項從練首次創舉,認真出盡風頭,今季頭馬更一下子彈上九場,暫時領導群雄,比第二位徐雨石多三場。

處女馬「麯院風荷」第23次在港出賽,終於以大熱門開齋,沿途守第四位,末段看似會輸,最終騎落逐步推進而非太勁,但最後一步仍可險勝「萬事欣」鼻位,雷神連同勝出第四場「索先生」及第六場「喜悅繽紛」,這天停賽期滿復出未完場已中三元領先騎師王。至於蘇偉賢四場頭馬則是「鴻圖戰士」、「有緣好馬」、「添好運」及「麯院風荷」。

蘇偉賢行大運,反觀告東尼同吳嘉晉就唔多好彩,兩師徒合作馬「萬事欣」沿途前領,拉士原本一直頂住「麯院風荷」可望先過終點,點知壓線一步俾對方擊敗,就此屈居亞軍未能連捷,三、四名分別為「好益善」及「友瑩勢」,四重彩派5,707元。