喺黑幫片中，一個成日會出現嘅劇情係劇中人同黑道交手時「食夾棍」，搞到全家都俾黑幫騷擾同埋報復。估唔到呢個情況竟然喺皇馬前鋒加里夫巴利身上出現，令到佢隨隊作客拉斯彭馬斯時，佢入住嘅酒店房外有三名荷槍實彈嘅警察把守！
話說加里夫巴利未婚妻艾瑪嘅艷模表妹丁丁（Epiphany Dring、圖）唔知喺邊度攞咗一個裝滿現金、可卡因同名錶嘅行李箱返威爾斯嘅屋企，估計約值100萬鎊（約1,050萬港元）。喺五個禮拜前，丁丁同埋個行李箱都突然唔見咗。上個禮拜，丁丁同艾瑪祖父母屋企出面架車，同埋丁丁媽媽屋企出面嘅兩架車，都接連俾人縱火。佢哋一位親友話：「事件係黑幫做嘅，佢哋想攞番唔見咗嘅錢。艾瑪知道事件後好驚，而威爾斯警方就話會檢討佢同加里夫巴利嘅安全問題。」
唔知係咪呢個原因，所以當巴利隨皇馬作客拉斯彭馬斯時，入住嘅酒店房外有三名荷槍實彈嘅警察把守，一名皇馬內部人士都話：「當球員見到巴利房外嘅保安咁大陣仗，都好驚訝囉！」而巴利亦可能受事件影響，上周六嘅鬥拉斯彭馬斯時雖然踢足全場，但就表現麻麻。
