LEGO最近搞作多多，今次就趁住年底《星球大戰外傳》上映之前，砌咗架全球最大嘅千歲鷹號。呢架千歲鷹號由3位澳洲同本地LEGO大師設計，就咁睇已經相當震撼，原來係由過千個小朋友幫手，喺冇用原力嘅情況下前後用咗3日同20幾萬粒積木砌成，認真威威。
同場仲有由本地星戰兼LEGO迷砌成嘅電影經典場景，其中最神秘嘅一幕喺9月30號先會公開，話會率先呈現外傳電影嘅奧秘喎，忠實fans記得親自去睇睇啦。
LEGO星戰展覽一連三個星期喺尖沙嘴海港城展出，逢星期六日仲有「黑暗勢力」到場同大家影相。小朋友仲可以參加挑戰賽，如果喺限時內砌好架星戰戰機，就可以帶架戰機返屋企。