噚日對醫學界嚟講係大日子，皆因培育唔少名醫大國手嘅中大醫學院35周年院慶。學院喺會展筵開10幾圍，中大校長沈祖堯、食衞局局長高永文、港大醫學院院長梁卓偉、醫管局行政總裁梁栢賢、候任立法會醫學界議員陳沛然等到齊；祖堯BB心情靚爆，仲同主持方健儀selfie！
噚日唔少現場人士都話祖堯BB清減不少，原來佢係刻意減磅，因為自覺太肥，佢話除咗夜晚少食白飯，當然都要配合做運動，先有家陣嘅效果啦！
中大醫學院院長陳家亮致辭時話，希望大家喺慶祝醫學院大日子同時，識得飲水思源。之後到高永文同祖堯BB致辭時，字裏行間都流露對2019年落成嘅中大醫院嘅寄望，祖堯BB仲講到明，要陳家亮好好孭起呢個重任喎！