耀才證券（1428）嘅賣盤新聞老是常出現，老闆葉茂林噚日同四位耀才靚女主播出席活動時，唔再話「天價」賣女，而係要「天棚價」先賣，點解？佢堅睇好深港通，估開車後港股成交會double升！
佢笑住講，「大女」耀才證券久唔久都有人搵佢傾賣盤，但暫時唔諗住。因佢覺得以香港人、深圳人賭性咁重，深港通開車後，炒賣會好活躍，保守估計港股交投將由目前700幾億元，煲到1,500億元，衰極都有1,000億元咁話。
佢隨即推介港交所（388），估有機會爆上320蚊，耀才就會跟住388行。
講到最近熱門嘅特首選戰，葉老闆以往一直撐梁振英，即使梁振英民望超低，佢依然心口掛個勇字，話特首個位「個個上去都死」，佢撐梁振英連任，因擔心「軟手軟腳嗰啲唔知佢得唔得」，「鍾意（政治手腕）強硬啲」。
