人稱元秋嘅民建聯蔣麗芸噚日出席喺廟街附近一個公園舉行嘅青年市集啟動禮，佢致辭時話早排同班大學生會面，有大學畢業生問佢點先可以成功？佢話好明白現時周街都係大學生，競爭好激烈，有人成功、有人唔太成功，其實分別只係大家有冇發夢。
元秋話年輕人讀得大學，基本上智慧都差唔多，「相差係乜嘢呢？肯諗多啲嘅人，肯做多啲嘅人，成功機會就會比人多啲，我希望各位年輕人諗多啲、做多啲、發多啲夢，有時人有夢想、有理想，就會達到你哋嘅希望」。
家吓有唔少候任議員「發夢」做立法會主席，包括梁君彥、田北辰、謝偉俊等，唔知最後邊個會成功，但元秋話呢班想做大主席嘅候任議員，冇人向民建聯爭取過支持，淨係識得同傳媒講，唔通嬲咗啲人冇向佢拜票？