點解基斯坦奴朗拿度（C朗）喺上周六西甲黑面？無他嘅，現年31歲嘅C朗，因為教練施丹堅稱要留力踢歐聯而換佢離場，點知博輸咗，最終皇馬作客拉斯彭馬斯被逼和2:2，你話C朗唔嬲嬲豬就假啦。最慘係巴塞同日狂數希杭五粒，榜首優勢追至只差一分。不過，施丹冇因為咁屈服，話之後會繼續咁做，要C朗面對被換走嘅日子。
巴塞大炒希杭力追皇馬
皇馬上周六喺西甲訪拉斯彭馬斯，踢到71分鐘領先2:1時，教練施丹作出戰術性調動，以盧卡斯華斯基斯入替冇波入嘅C朗；C朗喺皇馬踢咗七年有多，未試過喺咁嘅情況下離場，所以佢即時黑面。點知好衰唔衰，皇馬喺85分鐘俾主隊前鋒沙治奧阿拿祖射入而慘被逼和2:2，繼上場打和維拉利爾1:1後再次失分。雖然，皇馬賽後續以四勝兩和得16分排榜首，但同同日贏希杭5:0嘅巴塞嘅距離縮減至一分；施丹換走C朗但幫唔到皇馬全取三分，睇嚟佢博輸咗囉。
查實施丹之前喺贏奧沙辛拿5:2場西甲，都喺66分鐘換走C朗，但當時皇馬領先緊5:1兼且C朗入咗一球，換走C朗唔算係戰術性調動，所以C朗離場時都冇面露不悅之色；不過今場佢換走C朗擺明係戰術調動，難怪C朗當堂黑面；雖然佢有同施丹握手，但望都冇望過施丹一眼，之後坐喺後備席上表現亦相當唔老利。
施丹博輸：會繼續咁做
施丹賽後解釋點解換走C朗：「C朗好想打足全場，但我哋周二有比賽（歐聯作客對多蒙特），所以我覺得佢需要休息吓。」雖然施丹博輸咗，不過佢會繼續咁做。呢位法國名宿咁話：「我有時會換走C朗，今場波我哋就咁做。之後都會繼續咁做。」C朗俾施丹換走一事喺西班牙回響好大，C朗媽亦即刻喺社交網站撐個仔，叫C朗唔好氣餒。C朗向來小氣，唔知佢會唔會趁機同皇馬會長佩雷斯打施丹小報告呢？
