網上流傳一啲文章，講馬雲有個夢想，唔知真定假，就係夢想有朝一日，全世界精英學生都爭相到中國留學，而唔係好似2016年現實社會咁，全中國以至全世界學生都夢想到美國留學。
網上虛假文章甚多，難言真偽，上面所云，確實只係一個夢想啫，以今天中國教育制度之僵硬，思想形態之專制，邊度會有太多外國人想到中國留學吖，學吓現代漢語（陶傑話唔等於民國中文），在中國貿易方面搵銀，先至係真嘅。假若「馬雲夢想」成真，中國教育自由活潑開放，思想百無禁忌，真正百家爭鳴，香港就唔駛一國兩制咯，香港人會爭住回歸一國一制。
夢話講完，回到教育現實，就係香港中產以上階級，爭相送子女往英美讀中學，往往係在中一之後，是故男拔、女拔、聖保羅男女、瑪利曼等名校到咗中二就有多餘學額接受插班生，唔似得中一招生咁爭崩頭。一位母親在飯局問左丁山：「我好矛盾呀，個女話同班同學紛紛預備出外讀書，佢都想去，我驚佢到咗英國就唔識中文，你話點好呢？」
哦，有一個現成例子，上星期紐約時報「婚事專欄」刊登咗記者小B喺9月16日結婚嘅消息，小B在美國出世，回香港讀幼稚園及小學，有香港身份證，後隨父母移民加拿大，一路讀書成績甚優異，考到獎學金入芝加哥大學讀經濟，畢業後返香港搵工，因立志不做銀行，竟然搵唔到工，唯一原因就係佢唔識中文，於是佢去咗《Time Out》做記者／撰稿人，但薪水不足以支付西環四百呎房租，於是失望返回美國，到紐約闖蕩，憑住一手好英文，今日成為The Atlantic嘅Associate Editor，薄有名氣，家人為佢高興。嗱，唔識中文（即係不懂閱讀不懂書寫）在香港搵工係好輸蝕嘅，父母唔介意子女中一後出外讀書，漸忘中文，以後長居海外，咁就冇問題，最怕係兩頭唔到岸，咁就誤了一生。講到尾，左丁山都係傾向要仔女讀完本地中學之後先至去英美留學，如考到入本地大學，就讀埋先至去，而且，一定要去外國起碼讀番一至兩個碩士學位領略外國生活文化，知世界之大，唔好以為香港係世界中心；去英美固然好，去一帶一路亦不拘，如朱凱廸咁去伊朗阿富汗咪就練就一身是膽，能吃苦踎在鄉村穩紮穩打囉，周浩鼎在倫敦讀LSE，學校就叻，但佢享受慣倫敦生活之後，就難同朱凱廸鬥硬淨嘞。