鼓勵學生以創意同科學知識加強溝通，並關心環境嘅聯校科學展覽，今屆以連繫為主題，參展嘅中學逾150間，另有海外隊伍應邀出席。由何文田官立中學4位學生設計嘅智能花盆「小植人」勇奪全場總冠軍。
呢個作品有3個感應器，分別監察植物生長所需濕度、溫度同光度，參與設計嘅學生謝業俊接受《政府新聞網》訪問時就拆解小植人獨特之處：「當濕度不足時，土壤濕度感測器會感應到，液晶顯示器就發出紅光，並發出聲響，提醒澆水。若光度不足，顯示器會呈綠色；若溫度不足，則呈藍色。」佢仲話使用者可以喺網頁遙控幫植物淋水，非常方便！
原來團隊了解過同學意見，發現有啲人想種嘢，但唔知點入手，有人又驚冇時間，靈機一觸諗到利用遙控，咁就唔驚因為落堂遲咗而遲咗淋水。