滙豐銀行香港區前一姐馮婉眉（Anita）離開獅子行已有一年半，過去呢段時間，佢主要做唔同機構嘅董事，好似恒隆地產（101）、港交所（388）獨董。佢呢位獨董又幾盡責，唔止一年去開幾次會，前日（周六）仲同恒隆一心義工隊，帶一班荃灣中學生遊大埔學歷史。
Anita除咗銀行業經驗豐富，原來對歷史與考古都有研究，前日佢就充當導賞員，帶埋超過30位來自荃灣嘅中學生，深度遊走舊大埔警署、舊北區理民府、鐵路博物館、文武二帝廟等多個具有歷史意義嘅景點。
佢認為，雖然上網容易搵到歷史資料，始終唔及親身感受嘅經驗寶貴。
講開又講，Anita只係55歲，休息咗咁耐，冇理由唔做番一份全職工作。佢做獨董都咁投入，跟埋去做義工，唔知有冇人搵佢做執行董事呢？