咩叫霸權？就係無論佢幾咁無理無良，都可以繼續無法無天，睬你都傻，唔使尊重你，亦唔使尊重自己。（請自行在上文及下文任何位置加入你最親切最火滾的粗口）全港都知，我哋要終止收費電視、寬頻電訊之類嘅服務，連希特拉用晒天地玄黃宇宙洪荒之力，都cut唔到。點解每次service有問題、每次要cut service，都好似要上屍殺列車打喪屍咁悲壯？已經官商鄉黑勾結，已經土地供應永遠冇人解決問題，點解香港人要咁悽慘？
有某收費電視超高層俾真老友嘅私人極罕厚禮，係「如果你有日真係要cut cut唔到，我幫你！」幾咁豪氣干雲，力拔山兮，等閒都唔出呢張皇牌，係香港cut service先要荊軻兩肋插14把屠龍刀咁至得嘅。
又點解啲customer service永遠冇service，唔用腦，同你作對，有聽講障礙，人肉錄音機，如今仲耍語言偽術？
「死人now呃咗我買plan然後又冇鬼咗US open……」約兩星期前我在面書上咁樣寫，朋友即刻WhatsApp來爆粗，話搵到嘔血，喺now都見唔到有US open，唔睇我個post都唔知，原來美網已經正式冇咗。同我一樣，佢嗰啲體育網球頻道同now係簽晒合約，仍要俾錢，因為你sell你有四餸一湯吖嘛，𠵱家忽然單方面縮水改menu？
已經好㷫，然後又有籃球fans送來噩耗，話來季NowTV連NBA都冇埋！佢好慘，同我一樣，網球籃球都冇得睇，體育頻道仲要個個月白交月費。哇，我個心即刻離一離，全部NBA冇晒?!我裝Now，當年被迫好貴咁啃埋佢個體育組合屈我要埋我唔睇嘅英超，都係為咗睇我打令費達拿打網球，同睇我由MJ時代一直追開嘅NBA，你𠵱家籃球全線冚旗封舖，網球又話冇美網就冇美網，都唔通知聲算點?!照呢個道理，同佢簽咗約，係咪佢靠一句「股票價格可升可跌」嘅免責條款，提供嘅服務就可以任改任變，消費者任佢魚肉，消委會你係咪要做吓炸兩呀，全港勁多畸屎喎。
衰到盡頭便是賤。我火燒心打去nowTV個咳屍氹媽service，個「毀滅客戶服務員」講嘅嘢難聽過粗口。你話，冇咗US Open喎，佢話，佢哋同唔知邊鬼個嘅合約完咗，出年都唔會有㗎喇。喂你同人合約完咗關我咩事，我同你合約未完嘛，我長期柯打一個套餐，每個月𠵱時俾錢，明明一年有四大滿貫四個main course，你突然冇咗一個，本來一年有牛扒、龍蝦、黑毛豬同鮑魚，你𠵱家鮑魚不翼而飛，魚蛋都唔俾番粒我，又唔主動報案，側側膊當無事？去咗開three C meeting呀？
然後我問NBA都冇埋？佢話係，因為球季完咗……嗱！呢句係最大條藥引，直情係全香港人最討厭嘅語言偽術，你扮唔關你事《推比人》？呢一刻我要爆嘞。賽季年年都完，你張合約跟賽季咩？咁新賽季我點解仲要俾錢，同我簽晒約，明明你話有得賣嘅貨冇咗，錢，我就要繼續俾，貨，你可以唔交，呢個係乜嘢做生意嘅道理、公道呀？然後個「毀滅客戶服務員」話「睇番啲數據你都唔係睇好多NBA啫」，「縫」一聲七級大火升做九級我一秒煲滾九煲水。咩叫多？戲碼唔啱、返工忙咪唔睇又要你管，日日睇先係苦主呀？我同你長期租咗㗎車，你毛啦啦冇咗，我仲要個個月俾錢，我唔搵你你當冇事，搵你你話我都唔係成日揸啦，商又係你黑又係你呀？因為簽咗約，巴閉啦，我又唔准cut service，否則要賠一年錢，呢種營商模式，呢種企業欺凌，同電子零件黨有乜分別，係咪合法訛騙，有冇觸犯什麼商品說明條例？
話時話更衰到盡頭便是賤嘅真人真事，係有朋友媽媽過身，伯母家中合約完咗佢打去終止寬頻服務，講明申請人已身故，個「毀滅客戶服務員」竟然話要個申請者親自簽名作實先可以cut！朋友又嬲又痛，「你係咪要我阿媽喺棺材彈番起身同你簽吖！」結果佢要親自拎死亡證去電訊門市理論，叫人情何以堪，呢啲係乜嘢咳屍氹媽service！
類似案例，已經係工商管理教科書典範：美國最大嘅網上鞋舖Zappos，試過有位太太買咗對靚靴俾老公，點知寄到嚟佢老公已經交通意外死咗，佢想將對靴退回，完全唔知道退貨原因鞋店接唔接受，仍然心碎地打咗去。結果貨退咗，郵費鞋商全包，付款全數退回。打電話嘅第二日，佢收到一束慰問鮮花，係接聽電話嘅顧客服務員送嘅，唔使請示上司，佢就以公費公司名義，關懷寄意。呢間公司嘅文化訓練出關心顧客嘅員工，對顧客信任，公司亦對員工信任。就係贏customer service，Zappos勁到Amazon要用12億美金收購，當年Amazon，都係贏人性化customer service，太重要喇。
點解香港嘅企業服務又差又貨不對辦，仲可以咁惡，仲要用精衛填海嘅抗爭悲壯戰鬥精神先可以斷絕關係。香港人睇嚟要用雲海之力，去同呢啲霸權爭取簡易分手、合約合理遵守同主動賠償先得，成功爭取嘅議員一定立大政績，等我哋有咩唔妥就引刀成一快cut他媽 service！
#受咳屍氹媽service欺凌苦主揮手區一定爆