【本報訊】源自德國、7年前落戶美孚的「黑暗中對話」體驗館，被視為香港最成功社企，自負盈虧經營，兩年即收支平衡。可惜這個被國際旅遊網TripAdvisor評為No.1的另類景點，新近卻陷閉館危機，行政總裁朱月如透露約滿在即，主動向業主提加租一成未獲回覆。由電訊業副總裁到過檔小社企任CEO，這個女強人已着手變陣，除另覓地方，又嘗試與商場合作，以游牧方式將黑暗體驗帶進社區，在漆黑中覓新出路。
記者：呂麗嬋
面積逾7,000呎的體驗館，租約為期9年，採3+3+3模式，每3年調整租金，今年正好進入第3個3年，「上一次租金調整，幅度與今次向業主提出嘅相若，但業主至今連還價都冇」。物色新場地有難度，既要考慮大小，亦擔心裝修成本難以負擔，「7年前開館用咗約500萬元裝修同買器材設施，𠵱家已暴升至過千萬」。租約2018年9月屆滿，打定輸數不獲續約的朱月如，苦笑謂「好似仲有時間」，其實已刻不容緩，「興建新館要好長時間，唔係搬office咁簡單」。
裝修成本貴選址難
體驗館整項裝修工程預料需6至9個月，除成本高昂，朱謂亦需考慮選址，「觀塘好多活化工廈地方大，租金相對較廉宜，不過馬路同行人路都好窄，體驗館同好多學校及企業合作，門口一定要有足夠空間停旅遊車上落客」。
社企現有全職及兼職視障員工約60人，主要擔任導賞員，最初主力推企業培訓，翌年股東集資設體驗館，引進另類體驗式遊戲，讓大眾透過全黑密封環境，一同用眼睛以外的感官體驗失明者的世界。
現時全球各地獲特許專營權的體驗館多由政府資助，如新加坡就設於大學內，「自負盈虧肯定比較辛苦，所以我成日講，如果你真係鍾意我哋嘅服務，淨係畀個like唔夠，一定要買我哋嘅服務」。
事實上，面向市場也是朱月如的信念，攻讀酒店管理的她，大學畢業即投身電訊業，先後在CSL及PCCW任職市務總監及副總裁，「固網電話未有2字頭就入行，由2G做到4G，又由鋼線做到光纖」。在競爭激烈的電訊業打滾近20年，2012年朱月如辭去厚職，原擬全力照顧獨生女兒，卻陰差陽錯投身社企。
「喺CSL任職期間，聲演會《暗中作樂》嘅贊助正係我負責審批」。因審批項目，她獲邀初踏體驗館「尋求黑暗」，自此結下不了緣，「我係一個好急嘅人，做電訊咁多年，突然睇唔到又冇晒通訊，你話幾徬徨？」衝擊視角的影像、喧鬧的世界，一秒之間驟然停頓，由不安到逐漸適應，讓她學懂以另一角度「看」世界。「喺伸手不見五指嘅環境，有人開心大叫，我就好享受嗰種寧靜，靜靜咁聽其他人講嘢，留意語氣想像佢哋嘅表情」。在這裏，再沒美醜，也無隨視覺而來先入為主的印象。
2013年，機會來了。藉推廣黑暗體驗創造就業的社企急聘舵手，她由審批贊助，搖身一變成了向大企業叩門的人。「喺商界多年，對社企運作冇太大認識，最初抱住幫吓忙嘅心態，諗住上咗軌道就走」。
扭轉社企待救印象
結果，無人看好的小社企成了最佳，就算花不常開，今日面對閉館危機，硬朗的朱月如亦選擇積極面對。「唔係冇咗份工咁簡單，而係覺得冇咗個家，不過事在人為，唔係末路」。剛過去的暑假，小社企首次與商場合作，以運動為主題設計黑暗體驗，對準親子客，實行拋磚引玉。
「呢個係好好嘅預演，反應唔錯。就算常設嘅體驗館最終關閉，我哋嘅服務仍然會繼續」。游牧式的pop-up體驗館，可配合不同節日主題，彈性更大，在她眼中一樣精采。扭轉社企傳統待救的印象，主動出擊，面向市場，「其實商場本身都要諗節目吸引人流，流動體驗館嘅設計，只係畀大家多個選擇」。就如創造僅兩年即達收支平衡的社企神話，朱月如說難題仍然多，但有信心達致雙贏，轉危為機。