警隊嘅一哥似乎鍾意退休後殺入商界搵真銀，舊年話有不能預計嘅家庭理由而「被辭職」嘅前公務員事務局局長鄧國威（圖）都有新動向，但佢就主攻學界。查實佢今年6月申請過做香港金融學院一個講座嘅講者，可能做開有鋪癮，今次去埋職訓局同人「些牙」。
睇番公務員事務局資料，今次請得郁Paul Tang開金口嘅，係職訓局高峰進修學院。學院主要開辦培訓財經事務、物業管理範疇嘅短期課程。鄧國威由今個星期四起開講，冇講明係邊個課程，但就話搵佢以專家角度講吓公務員同本港公共事務管理嘅議題，都算開正佢嗰瓣，話晒做過37年公務員。公務員事務局都好順攤咁批准，淨係叫Paul Tang唔好披露政府機密同敏感資料就得嘞。