《頭條新聞》噚晚復播，雖然新一輯喺無綫電視翡翠台播出嘅時間從星期六晚7點改咗做閒日傍晚6點非黃金時段，但節目內容相信一樣精采，睇睇主持人之一嘅羅啟新喺facebook點樣瞓身宣傳，就知唔會hea做。
係呀，真係名副其實瞓身㗎，而佢嘅蛇美人甫士，係咪似曾相識？冇錯，就係新民黨主席葉劉淑儀早前喺西班牙西維爾旅行時，喺路邊長凳S形瞓覺嗰款。呢張潛力圖喺網上熱爆，難怪走嬉笑怒罵style嘅《頭條新聞》都要抽吓水。
羅啟新喺facebook留言，「就讓我化身葉太來個西班牙式海棠春睡」，唔知呢兩個瞓覺po，大家鍾意如假包換抑或二次創作嗰個多啲呢？