求驗客手記：
摩佬出書贈㷫
「想打爆雲格」

雲格帶兵廿年不倒，各路人馬就算幾唔妥佢，都會畀幾分薄面美言幾句。不過，曼聯領隊摩連奴即將出版嘅自傳內容咁啱俾英國《每日郵報》流出，大爆摩佬高呼要打爆雲格塊面，咁贈「㷫」法，唔知係邊個主意？
摩佬同雲格積怨十幾年，「偷窺狂」、「失敗專家」呢啲經典語錄街知巷聞；體育記者比士利仲喺摩連奴本自傳大爆，佢喺2014年寸完雲格八年無冠係「失敗專家」後都未息怒，親口同佢講：「雲格就桑馬達單交易批評車路士同曼聯……終有一日我會喺球場外搵佢，打爆佢塊面。」摩佬淨係得把口，可能因為幾周後車仔主場炒阿仙奴六球，令帶隊千場嘅雲格嬲到唔去記招，摩佬條氣即刻順晒，仲爽歪歪咁講：「下次我輸波都唔去記招喇，因為架隊巴等緊我！」會唔會太寸？
呢排個個都講朗尼，呢本自傳就證實摩佬喺2010年教緊皇馬同2013年帶車仔嗰陣都想簽佢，仲問過比士利「我哋想簽嗰個肥仔（the Fat Boy），你點睇？」𠵱家得到手，摩佬會唔會慨嘆喺錯的時間遇見對的人？

原來伊娃係救命恩人

呢本書除咗球圈花生以外仲有花邊嘢睇，大爆摩佬有次帶車仔去美國集訓，其間喺酒店暈低，全靠當時未反枱嘅軍醫伊娃傍住先冇事。呢本傳記29號喺英國出版，售價16.99英鎊（約171港元），亞馬遜等網絡書店已經接受預訂。