人生有幾多個10年？法國籍領隊雲格為阿仙奴貢獻何止10年，周六英超主場大戰車路士前夕，就係佢接手20周年。雖然近年佢飽受無冠同孤寒等批評，不過作為英超現役執教最長壽領隊，佢對「兵工廠」以至英超發展，點都係譽多於毀。
雖然雲格喺1996年10月1日先正式入主阿仙奴，但其實佢9月22日已經到練習場見球員，兩日後又喺看台睇球隊比賽，所以周六之戰算得上雲格執教兵工廠20周年。阿仙奴當然高度重視，官方商店就推出雲格20年紀念章禮盒，限量5,000套，售價50鎊（約500港元）。
遺憾未染指歐聯冠軍
要講雲格喺阿仙奴嘅日子，大概都可以分頭10年同尾10年，頭10年算係佢最風光一頁，上任18個月就喺1997/98球季贏到英超同英足盃雙料冠軍，2003/04球季更加登𥧌造極，以全季不敗成績第三次拎英超。或者，雲格嘅遺憾係仍然未嘗歐洲賽冠軍，2006年歐聯決賽不敵巴塞隆拿，可能係佢最遺憾一仗。
2006年後，因為阿仙奴啟用新嘅阿聯酋球場，要償還巨額重建費同利息開支，雲格除咗做領隊，仲好似做埋財務總監咁，千方百計為球會慳錢，甚至高價出售亨利、法比加斯同尹佩斯等隊長級球星，加上轉會費傾唔掂，成日錯失好似耶耶托尼同希古恩呢啲球星，被網民暗寸佢險簽。雲格喺兵工廠拎到嘅九個主要錦標當中，只有兩次英足盃，係喺呢後10年攞到。不過點都好，佢始終令阿仙奴保持高度穩定，20年內未嘗跌出英超前四，屆屆都可以踢高獎金嘅歐聯。喺阿仙奴20年，雲格都幫英超帶嚟唔少新氣象，好似重點引入法國兵，而且講求地面戰術，喺當時英超都係新潮流。咁多年嚟，雲格都同唔少領隊亦敵亦友，好似已退休嘅前曼聯領隊費格遜，兩位老人家鬥足十幾年，但都彼此欣賞，不過前車路士、現任曼聯領隊摩連奴就仲咬住雲格唔放，出新書話要打爆雲格（見另文），但雲格嘅回應就好大方：「我未睇佢本書，亦都唔打算睇，我冇俾佢影響，只想專注周六比賽。」
66歲未言退 難覓接班人
雲格接受英國《每日鏡報》訪問就話，對於即將踏入20周年，真係好難形容自己嘅心情，以𠵱家英超成日換領隊嘅情況，自己就好似恐龍一樣「絕種」。
66歲嘅「教授」就冇透露幾時退休，只話希望繼任人可以保持到阿仙奴嘅成績，不過佢嘅接班大計似乎俾亨利打斷，原本佢想亨利接手，安排佢做住青年軍教頭先，不過呢位阿仙奴傳奇前鋒因為唔願放棄評述員工作，同雲格交惡，𠵱家轉任比利時助教，雲格要搵接班人真係幾頭痕。