首列國產高鐵列車本月底運嚟香港，港鐵facebook噚晚突然快閃出po，大字標題《香港列車現真身》，話架車即將到港，仲有介紹部國產高鐵嘅宣傳片，但條片出咗個零鐘就極速消失，之後又靜雞雞出番嚟，眼利網民仲發現舊片驚現簡體字。
八方眼明手快睇到條片，港鐵喺條片入面標榜全程有派人去監察呢部由中國南車青島四方生產嘅CRH380A列車生產過程，又話出廠前做晒測試，仲要喺滬昆高鐵線唔載客行夠5,000公里先出廠。
個po一如港鐵以往自製嘅關公災難，俾網民迅速笑爆設計土味極濃，有人仲話唔計用料造工問題，「配色好核突，車廂內部好求其，頭等又唔夠頭，抄人就抄足啲啦！」