「巴基之星」馬主丁志強Kerm Din肯定係一位愛國人士，僑居香港做生意，不忘故國，將自己件馬主綵衣設計成綠色底，胸前背後嘅左右，各有三顆白色五角星，加埋共12顆白星，襯住綠色，十分搶眼，再加埋隻馬戴眼罩出賽，亦係綠底白星，唔怪得隻馬兩出兩勝，技驚四座之後，影片放上YouTube，立即在巴基斯坦瘋傳，贏到無數個like。巴基斯坦國旗就係綠色底，配上白色彎月及一粒白星嘅，「巴基之星」贏馬就好似保特贏奧運一百米、二百米，衝線後以牙買加國旗裹身行圈一樣。
咁愛國，「巴基之星」他日如能衝出香港，往杜拜參加世界盃，往皇家雅士葛在英女皇面前贏一級賽，巴基斯坦總統大概會頒發國家榮譽勳章俾丁志強，此乃賽馬引人入勝之處，每一個馬主都發夢如此「人憑馬貴」。
成班老友食午飯，講「巴基之星」講到口沫橫飛，最後有一位報紙老總提出：「明年3月26日有邊隻馬入閘爭特首，有冇『巴基之星』在內？」此語一出，大家又試議論紛紛，一致認為在任特首梁振英一定入閘，在任人士永遠有贏在起跑線嘅絕對優勢，可以利用政府政策為自己製造有利形勢，主動出擊，得到最大媒體曝光率，非梁特為然，英美德法各國莫不如此。邊隻馬陪跑可以爆冷呢，三大半冷門係林鄭、葉劉、鬍鬚曾，兩隻冷門係愛國曾與馬拉松。與建制派有來往嘅老友話假若曾先生當選，佢請晒我地去福臨門。咁豪？非也，原來佢認定一位曾先生在美國讀書太耐，中央唔會好放心，另一位曾先生表現唔夠強硬，打拉布不力，中聯辦不滿。馬拉松則已久無熱身操練，動態欠積極，於是剩番兩女大戰一男，最恨到流口水嘅係葉劉，林鄭一副欲拒還迎姿態，屬伺機出擊格。左丁山儍儍地問：「有冇泛民加入戰圈呀？」老總話：「泛民邊度有人吖，有一個余若薇，都係輸梗，唔會嘥氣力㗎嘞，除此之外，邊位泛民議員出嚟，都似係無間道，搞亂檔嘅啫，泛民否決咗特首普選之後，注定冇機會參選。」咁講法咪就係梁林葉之爭？現任特首佈定個局，搞大港獨議題，製造形勢俾新左翼入立法會，於是一副平定亂局，捨我其誰嘅姿態，其計算之深，兩位才女，有所不及也。席中有一位老友剛與退休前高官飲過茶，聽到前高官講：「公務員起碼有一半係講ABC，C者Carrie也」，咁又唔係幾好聽，原來林鄭成日話好打得，公務員跟到氣咳執手尾喎。