新一屆立法會10月12日開鑼，70位議員當日宣誓就職。隨住唔少老將離場，又新增本土、自決派，各黨派會議廳座位表都要執位。八方聽聞大致格局冇乜變，非建制同建制兩個陣營一左一右，非建制除咗青年新政游蕙禎同梁頌恆以及熱血公民鄭松泰外，大致已經協調好。
八方聽聞，公民黨繼續喺主席台左邊最前兩排，民主黨就喺後3排靠左7個位，側邊剩低嘅位，幾個非建制功能組別「專業議政」議員會坐埋一齊，街工梁耀忠坐番原位。
長毛同慢必上屆坐喺主席台正中間最後兩排，要掟嘢好考手力，衝出主席台又好快俾保安攔截，今屆坐前少少，搬去中間第4排靠左走廊位置，衝出去都快兩步。
建制死守中間前排
香港眾志羅冠聰、朱凱廸同劉小麗就坐喺尾二嗰排，有工黨張超雄做鄰居一齊抗爭。據知建制派座位都冇乜大變，中間前排當然死守唔放，所以梁頌恆同游蕙禎以及鄭松泰可揀嘅位唔多，極有可能坐喺中間最後一行，實行後排攻擊。