呢期香港突然湧現雞腸熱潮。繼特首梁振英教識大家，特首與三位司長嘅三司會叫Three C meeting，上水鄉委會主席侯志強不甘示弱，噚日喺公開活動騷哥利，回應CY話搵地「粒粒皆辛苦」時，以一句「choking my air」霸氣回應，有網民封咗侯志強為新一代chok王，林𥧌都要甘拜下風喎！
「刮目以待」睇政府建屋
鄉議局噚日舉行國慶酒會，橫洲風波自然係焦點。新東上水嘅侯志強隔岸觀火，對於新西元朗發生嘅爭議，佢話「睜大雙眼、刮目以待」，會睇吓政府點樣落實建屋承諾，繼而自稱「冇錢、冇地、得棚骨，仲有咩好驚？」風眼外嗰種風騷，果真零舍不同。
咁佢呢位花生友，點睇特首梁振英日前喺記招上哽咽話粒粒皆辛苦？可能見CY一句Three C meeting爆紅，侯志強唔執輸笑住反問：「有一句英文叫choking my air，你知唔知點解？」直譯嘅話，即係chok住道氣啦，點解道氣chok住？侯志強卻唔再解釋，只留低畀大家心領神會。
有傳媒就想一得三，指教下英文問題，侯志強笑指：「唔好講英文，我得一句咁多㗎咋！」若然講番搵地難，佢就大把嘢講：「香港大把地，使乜去搵吖？如果冇，我帶你去睇。」
侯志強又指香港80%土地位處新界，政府嚟諮詢係好正常，但唔好再用摸底呢類「美麗詞語」、應該改稱初步諮詢，皆因摸底一詞，「係對男朋友、女朋友講嘅！」
至於係咪有官商鄉黑？佢就話自己着緊嘅外套係黑色，幽記者一默：「你哋傳媒係咪同黑衫嘅人摸底？」
李八方
mailto:[email protected]