勢估唔到，一隻新馬出兩次，贏兩次，就可以成為全港最注目嘅明星馬，上「蘋果日報」頭版，呢隻馬當然係「巴基之星」Pakistan Star，馬主係巴基斯坦人Kerm Din，有個中文名字叫做丁志強，丁先生另外有隻馬叫做「巴基小子」，冇乜人注意到嘅第三班馬。佢今年三月在國際拍賣會以六百萬元買入一隻新馬，取名「巴基之星」，咁就改變命運，人憑馬貴，好似七十年代咁，只在會計師行業出名嘅容永道先生，憑馬王「祿怡」而成為香港知名人物，為運通卡賣廣告，Do you know me？容先生在電視廣告講：「你未必知道我係邊個，但一定認識我隻馬『祿怡』。」
巴基之星能否成為另一隻「祿怡」或「精英大師」或負154磅而創千六米紀錄嘅「同德」，尚待時間考驗，目前言之過早，但呢隻馬頭兩仗之表現，實在驚人，兩次都漏閘，輸在起跑線，兩次都轉入直路後，走大外檔發力狂衝，逢馬過馬，輕鬆取勝；好似上星期日咁，跑第二嘅「萬馬飛騰」，騎師潘頓沿途在內欄慳位，一步不蝕，末段如飛殺上，跑22.1秒，已經係好快段速，但「巴基之星」竟然跑出21.4秒，用步速專家方駿輝術語，直情係極限段速，「萬馬飛騰」最後猛咁落飛，賠率由8.9倍打到7.9倍，「瀟洒王子」（跑第四）落飛到8.2倍，「阿甘」由10倍落到7.9倍，益咗「巴基之星」嘅賠率由1.4倍升上1.7倍，輕鬆取勝，可知大戶落飛並非一定係神仙，佢地嚴重低估咗「巴基之星」嘅實力，不自量力而已。
於是有馬迷講：「唔好成日話要贏在起跑線，要贏在終點線先至係真嘅！」這個當然，鄺俊宇考六次會考，中三時就因為中三淘汰試而轉校，現在成為立法會議員，與讀書尖子涂謹申（港大法律學院畢業）平起平坐，直情係出閘大跌腳，贏在終點嘅人辦。香港各位家長，或者要領悟到輸在起跑線並不出奇，也不應懼怕，最緊要在人生長途賽之中，贏在退休前！「巴基之星」與千六王「步步友」同父系，以佢嘅跑姿，以及血統，跑千六絕無問題，只要健康正常，有資格成為另一隻「步步友」，至於贏唔贏到打吡，有待考驗，「步步友」就唔夠長力嘞。有一隻新馬「京京千里」，身價850萬，馬主係內地富豪劉玉文，初出千二米，㩒住贏四個馬位，亦係劍指打吡嘅，2017打吡本來以為係愛國商人洪祖杭隻「佳龍駒」最有希望，但假如「巴基之星」與「京京千里」趕得切六個月後爭打吡（3月19日），賽事會好睇過3月26日特首選舉。