雖然玖龍紙業（2689）舊年業績一般，純利差過對上一年，但如果唔計滙兌虧損，盈利反而創出公司史上新高，難怪董事長張茵噚日心情勁靚，揀咗一套紅色繡花旗袍出席業績會，企埋一班西裝男中間，特別搶眼。
張茵着得紅色衫，當然希望公司業績鴻運當頭，股價有升無跌。佢亦可能想將自己化身成為100蚊「人仔」，「集氣」照住人仔滙價息率穩穩定定，生生性性，皆因玖紙講明，為消除滙兌風險，會將公司人仔債務佔比逐步增加，若然人民幣有乜大郁動，突然加息或升值，拉高借貸成本，張茵嘅如意算盤又打唔響。
玖紙可唔可以借住張茵道氣繼續上，冇人會知，投資者就用實際行動支持吓，公司股價噚日升8.3%，董事長着紅衫現身，真係旺啲喎。