橫洲黑幕，打橫嚟。
梁特橫卧摺凳上陰陰嘴笑，想出使橫手絕招，把心一橫，華麗甩身。
第一，犧牲手下一兩個港英餘孽，雖然梁特衰到無朋友，但下屬大把，運房局和地政署無可避免要含淚揹鑊。發展局那位潛水局長，有難你當！否則當年明知你身有屎都保住你，為乜先！（X，今次着草都唔掂！）
第二步，成立乜乜乜複雜都無人明的專責調查委員會，架床疊屋調查元朗內幕。也就是說，將個波踢去越位陷阱，邊個觸球，邊個被否。唔否，就係打假波！調查無限期查下去，好快變萬年足球隊，波，搓圓抹黑乜都得。（傳召證人學世界盃，搞足四年，玩殘球證！）
第三，鄉黑得寸進尺，以梁特作風，邊個阻路，就算是一座泥頭山，梁特都會炸平佢。橫掂鄉黑惡行數唔清，只要向傳媒洩漏丁點內幕，馬上淪為過街老鼠。（塊地唔郁你，人就話唔埋，更高層次的麻煩陸續有來！知驚吧，即刻卜機票消失！否則，屍橫遍野！）
最後，為了香港好，新界好，將橫洲改名叫做橫濱，轉運！