特首梁振英同財爺曾俊華前日同場見記者，為橫洲發展黑幕解畫，鬍鬚曾同梁振英不時面左左，令唔少網民食花生食到滯。佢哋兩個噚日下晝再次同場，出席香港新聞界國慶酒會，兩個人再碰頭同樣喺人前交足戲，人後就零交流。
另一酒會前後腳避同場
八方所見，噚日先到場嘅鬍鬚曾，喺貴賓室見到CY到場後，兩個人冇偈傾不特止，CY行過鬍鬚曾面前都係掂行掂過，連招呼都冇打一個。到活動開始，CY率先入場，財爺就隔咗十幾個身位，慢慢同商業電台新聞及公共事務總監陳淑薇咬耳仔入場，明顯要同CY保持距離。
到祝酒環節，台下傳媒同嘉賓個個望住，台上嘅CY知道要交戲，左望望右望望後，主動走去同鬍鬚曾碰杯，呢吓舉動令在場唔少傳媒即場「嘩」咗一聲，之後兩人就各自喺台上祝酒。鬍鬚曾之後率先落台，隨即俾大批賓客捉住集郵，CY就喺保鑣護送下迅速離開，拒絕回答記者問題。
財爺比CY留耐5分鐘咁多，被問到有立法會議員表明要用特權法調查橫洲事件時，佢只係笑住咁話「我唔講㗎嘞」就轉身離開。佢似乎心情唔錯，全程笑笑口，臨尾仲特別向採訪佢嘅傳媒揮手，先至登上紅色座駕離開。
傍晚財爺再出席另一個親中團體香港廣東社團總會國慶酒會，但留咗15分鐘即走，冇同7點至到場嘅CY同場，有記者問財爺係咪故意避開CY？財爺笑而不語，一切盡在不言中。
李八方
mailto:[email protected]