【本報訊】遭受到人生重大事故，隨時可觸發強迫症，尤其抗壓力低的人。青山醫院醫生韓敬謙表示，曾有一名30多歲男子喪母一至兩個月後，出現多種強迫症狀，包括重複穿上及除下褲子、食飯時不停站立及坐低，嚴重影響日常生活及返工，被家人帶往求診，需入院治療。
韓指該病人性格屬完美主義者，加上抗壓力低，自喪母後便出現強迫症表現。
患者最初病發時因擔心「着褲唔整齊」，出門前不斷重複檢查是否扣好鈕、拉好褲鏈。
經常遲到 拖慢工作
該名男病人又怕掉轉褲子穿，故不停重複穿褲子及除褲子步驟，日常返工及約朋友都經常遲到。之後病人出現「怕拎嘢會唔穩陣、會跌嘢」的念頭，重複將書本、文件，甚至紙張都要不停放低及拿起，「怕拎得唔好，張紙會跌」。他從事文職工作，也會重複檢查各樣文件及工序，導致拖慢工作，最終無法工作。
病情最差時，男病人因擔心站立或坐下時不穩陣、怕跌倒，導致經常「坐低又起身，起身又坐低」，連與家人食飯也受影響。他在家人勸解下前往求醫，確診屬較嚴重強迫症，需住院接受包括藥物、認知行為等治療方案，才控制強迫症病情。
■記者梁麗兒
想輕輕鬆鬆健康啲，記住留意健康蘋台
http://health.appledaily.com.hk/