NBA新球季10月開鑼，但《ESPN》周三突然爆出「狼王」加尼特（Kevin Garnett）有意退役嘅消息！有傳木狼班主泰萊（Glen Taylor）仲未聯絡到加尼特，但球會準備買斷呢位40歲老將尚餘800萬美元（約6,205萬港元）嘅合約。
95選秀梯隊或全引退
加尼特喺1995年以高中生身份參加選秀，俾木狼以第五位揀中，一直效力到2007年先轉投塞爾特人，同皮雅斯（Paul Pierce）、阿倫（Ray Allen）合組「三巨頭」並贏得冠軍，之後喺2013年被交易到網隊，直到舊年重返木狼。木狼班主泰萊話問過加尼特會唔會喺新季繼續為球隊披甲，但呢位40歲老將未有回覆，加上恩師桑達斯（Flip Saunders）喺舊年離世，相信都令加尼特更難決定下季係咪繼續留隊。
睇番1995年NBA選秀梯隊（見附表），只係剩番加尼特一個征戰NBA，同期嘅祖史密夫（Joe Smith）、史達侯斯（Jerry Stackhouse）、華萊士（Rasheed Wallace）同凱保（Fred Hoiberg）等人都退晒役。唔知加尼特會唔會學呢班戰友轉型做教練或者球隊管理層，繼續留喺球壇？
