自由黨榮譽主席田少田北俊同社民連長毛梁國雄一個商界、一個基層，可謂議會內嘅老對手，話雖如此，但原來田少都有撐長毛嘅時候，只係田少貴人善忘唔記得咗，要大主席曾鈺成提佢先記得。
曾鈺成噚日繼續喺電台訪問田少。講番舊事，當初長毛啱啱做議員着件tee就去開會，被質疑有違議事規則中衣飾要莊重嘅條文，搞到要議事規則委員會開會傾，大主席問田少記唔記得同民主黨創黨主席李柱銘一樣係委員嘅佢當時點睇。
田少話英美議會嘅男議員都打呔以示莊重，相信當時自己都係咁睇。不過大主席糾正話記憶中唔係咁喎，田少應該係撐長毛，反而李柱銘覺得男士要莊重就應該打呔，田少聽到都失笑話，乜自己舊時咁開明㗎。