港股近期喺高位chok上chok落，九倉（004）靚女董事凌緣庭選擇沽少少股票套現，實行袋袋平安先。
根據聯交所資料，凌緣庭上星期一行使20萬股認股權，跟手喺呢個星期一沽貨，平均價56.063元，套現1,121萬元，扣除行使價46.9元，賬面獲利約183萬元。
睇番年報，凌緣庭舊年總年薪820萬元，當中400萬元係花紅，今年佢基本薪金388萬元，呢次沽貨獲利金額，當係少少花紅，相當禾味，可以買幾個手袋仔獎勵自己。
凌緣庭都算厲害，1991年參選國際華裔小姐得冠軍，之後未有投身娛樂圈，反而負笈英國，再返港考取專業資格喺商界發展，轉眼喺九倉工作12年，2013年升為董事。今年佢積極為海港城做推廣，做宣傳唔使搵model喇。