Viu TV早前邀請王丹拍攝新一輯《跟住矛盾去旅行》，王丹建議搵鬧過香港人係狗嘅北京大學教授孔慶東同行，但俾孔慶東拒絕咗。不過花生友唔使失望喎，皆因最終同王丹一齊去日本東京嘅，係港大學生會前會長馮敬恩，相信同樣能夠擦出火花。
王丹喺facebook話電視台推薦馮敬恩，話佢可能係比孔慶東更好嘅人選，因為馮敬恩係香港青年參政者中嘅港獨派，係香港政治新景觀，王丹都想藉此機會了解撐港獨年輕人嘅諗法。
而馮敬恩批評過維園六四集會，係主張同中國民主化切割嘅代表人物之一，王丹話絕對唔認同呢個立場，所以希望深入溝通同辯論。王丹話同唔同觀點嘅年輕一代交流想法，或者比同孔慶東鬥嘴更有意義。