大家一邊話年輕人唔睇電視，但就越來越多人想做電視台，就連鳳凰衛視都申請免費電視牌照，偏偏九倉（004）旗下奇妙電視嘆慢板，噚日問到主席吳天海對於有人加入戰團，有乜睇法，佢竟然答「未有說法」。
吓，未有說法？上市公司管理層對於一啲佢哋唔想答嘅問題，通常都係話「no comment」、「唔評論」之類，吳天海因乜咁創新，答未有說法呢？唔通吳天海要等上大人指示，先至有個說法，誰是上大人呢？認真耐人尋味！
講開又講，海港企業（051）2013年投得政府物業美利大廈，改建為酒店，明年底就開幕。吳天海最近專登搵埋當年美利大廈嘅建築師Ron Phillips拍片，想指出項目原本就好似鑽石咁靚，經海港企業執一執，就好似鑽石再打磨，更加blink blink咁話。