余文樂出身元朗，喺當地留下唔少足印，仲有隊籃球隊叫橫洲工業，近日橫洲黑幕爆大鑊，究竟隊波同橫洲有乜關係？有指係因為余文樂同一班元朗仔當年喺橫洲工業區籃球場練波，所以用咗呢個名喇。
余文樂之前受訪時講，諗過隊名叫「新界西籃網」，至於橫洲工業呢個名，佢話都唔知點解改嘅，可能係因為鍾意山王工業（《男兒當入樽》內全國三連霸球隊隊名，王牌係澤北榮治），隊波叫橫洲「好似就猛啲，工業好似上巿公司，有啲實業feel」。
橫洲工業網頁有介紹番，話隊友自細玩大，「由籃球把我們聯絡起來，透過刻苦的訓練，追逐着同一個籃球夢。2010年，我們希望透過一個籃球，把大家凝聚一起，所以組成『橫洲工業』四出參加比賽，一起運動、練習比賽，從籃球出發」。好熱血！