相信唔少人都講過粗口，蔡卓妍（阿Sa）喺電影《雛妓》入面講過、宋智孝係節目《Running Man》入面都講過，咁點解今屆港姐冠軍馮盈盈，喺選港姐前講過粗口，就要被批評為「妓女不如」？到底大眾對講粗口嘅女性有咩睇法？一齊問問啦！
記者：倩宜、吉吉、馮國康 攝影：Neo
YoYo：「好平常啫，覺得依家講粗口冇咩特別。我屋企人都講粗口，佢同我都一齊講粗口溝通，覺得無問題，無代溝。最近學咗個新叫『點五步』，意思即係X你老母。」
Chole：「我平時冇講，一向都好樂觀，點會講。但我唔會歧視講粗口嘅人，歧視嘅冇人同你做friend。」
阿寶：「我覺得係一個助語詞，講粗口個個都會，你唔講粗口，嗰句嘢好似有啲唔make sense。」
MJ：「我覺得絕對無問題，呢個係表達情緒嘅一個方法。我梗係講啦，好似你老味、Ｘ呀嗰啲囉，但係我唔會問候人娘親，始終太衰。」
伊蒑：「我自己都講，文化嚟0架嘛，普普通通就會講。」
何小姐：「睇下粗成點囉， 如果唔係好犀利嘅，有時發洩下少少唔緊要。我有時㷫起嚟，都有一兩句少少哋，但唔會好粗嗰啲囉。」
張小姐：「無論男仔定女仔都唔應該講粗口，唔係話唔應該講，係睇下你咩場合先可以講，有陣時你自己發洩嘅ok，但正經嘅場合就唔好講。如果你單憑佢（指馮盈盈）講咗粗口，就判斷一個人嘅人格，咁樣係唔應該嘅，都覺得呢句有少少難聽過粗口，因為意思都係貶低一個人嘅價值。」
詩雅：「無問題，助語詞嚟架嘛！呢個係香港文化嚟，我都會講。」
謝小姐：「我覺得男女講粗口都唔係咁好，你有咁多詞彙，點解唔用其他詞彙可以表達、可以聽得懂嘅詞彙？通常粗口都係啲生殖器官，你咁擺上枱，無論男男女女，都係代表你無見識。我好少講，極度嬲會有機會，可能詞彙難以表達嘅時候會有機會講。」