周日（25日）沙田賽事有乜睇頭？當然係雷神莫雷拉停賽期滿復出啦！
好多馬迷開季前都預期，以雷神嘅騎功及馬圈嘅地位，好快就可以喺騎師榜遙遙領先，點知暫時來講一地眼鏡碎，雷神家陣有4場頭馬，雖然唔算太差，但遠遜馬迷預期，落後榜首潘頓5Win（未計21日夜賽戰果）。
既然雷神有少少「脫腳」，今期梗會加多兩錢肉緊，戰馬中必須留意一對新座騎「美麗之友」及「踏雪名駒」。告東尼馬房的「美麗之友」開鑼日跑直路賽，弱配吳嘉晉排最差之1檔，都拼入殿軍，頭馬「歷險家」再出二班都入Ｑ，反映賽事水準極高，今次「美麗之友」出到雷神，你話騎功高過吳嘉晉幾多班？有力為馬兒打開在港勝門。
至於告達理馬房「踏雪名駒」，本月11日由黃皓楠跑第二，只輸短頭位，再爭五班1400米只係孭118磅，咁優厚條件，唔怪得惹來雷神垂青肯騎啦！