「你我霎眼抗戰二十年，世界怎變，我答應你那一點，不會變」，歌曲《抗戰二十年》係香港搖滾天團Beyond喺2003年為紀念成立20周年推出嘅作品，03/04英超球隊發生咩事？阿仙奴以全季不敗成績贏得英超冠軍（圖），冇錯，亦都係兵工廠最後一次英超冠軍。
今個星期六係雲格接手阿仙奴20周年嘅首場比賽，英超賽會安排阿仙奴主場對車路士，唔知係有心定無意，畢竟阿仙奴04年之後再拎唔到冠軍，往往喺車路士、曼城等超級富豪球隊橫空降世下，打破昔日阿仙奴曼聯二龍爭珠場合。車路士、曼城上季相繼倒下，阿仙奴原本重拾爭標希望，但就俾李斯特城灰姑娘式奪標，雲格錯失呢次大好機會，可能餘生都冇辦法再拎到冠軍。
就算世界點變，雲格喺轉會市場操作真係冇咩點變，量入為出，嚴格控制人工，仲有絕招平買貴賣，之前趁剩餘價值將亨利、尹佩斯等出售，無疑受球迷批評，不過喺財政角度算係贏番仗。就好似今季季初，曼聯搵摩連奴接任領隊，花近1.5億擴軍，甚麼保羅普巴、伊巴謙莫域一一獵到手，相反阿仙奴繼續險簽，希古恩唔嚟，廠迷要求換帥呼聲亦高，不過目前阿仙奴仲領先曼聯一分排第四，起碼對得住球迷。當然雲格都唔係一成不變，戰術上佢都不斷改變，由接手初期踢4-4-2，之後改為4-2-3-1，到近期希望加快節奏改踢4-3-3，將山神推上前線同伊禾比、禾確特合作，贏侯城只係前奏，雲格當然希望好似利物浦咁，以快打亂攻破車仔。文：牽牛